Jubileumsfeiring

Fredag 20. september kl. 8:30 -10:15 inviterer vi til togfrokost og folkefest på Dombås stasjon saman med Jernbanedirektoratet og BaneNOR. Her blir det fin musikk og frokost til alle, før vi sender av garde jubileumstoget i retning Åndalsnes med stopp på Bjorli og Verma.

Same veka kan du sjå ei flott fotoutstilling om Raumabanen på Dovre folkebibliotek. På opninga måndag 16. september kl. 18:00 kan du høyre eit føredrag om jernbanehistoria og sjå bilde frå Raumabanens historie.

Transportåre og turistattraksjon

Hundre år etter opninga er Raumabanen framleis ei viktig transportåre. Der den buktar seg forbi attraksjonar som Trollveggen og Romsdalshorn, har den òg blitt sentral for reiselivsnæringa.

Den 115 km lange turen frå Dombås til Åndalsnes er kåra til den vakraste togreisa i verda av reisemagasinet Lonely Planet. Den har òg blitt brukt som kulissar til filmar som Harry Potter og Mission Impossible. 

Historia til Raumabanen

Raumabanen var sjølve livsnerva for post og persontrafikk mellom Austlandet og Møre og Romsdal frå opninga i 1924 til 1970-tallet. I dag har veg- og lufttransport teke over ein del av denne rolla, medan banen har blitt meir sentral i reiselivet. Raumabanen har spela ei sentral rolle i å knyte regionane våre saman.

Historia til Raumabanen har mange spennande kapittel. Bygginga var i seg sjølv ein stor prestasjon, både av ingeniørar og rallarar. Så kom andre verdskrigen. Raumabanen fekk spela ei viktig rolle da den i aprildagane 1940 vart brukt til å transportere ut 3 000 gullbarrar frå Noregs Bank. Dette var eit viktig tiltak for å hindre den tyske invasjonsmakta frå å få tak i verdifulle ressursar. Frå Åndalsnes vart gullet sendt ut av landet med britiske krigsskip.

Vi ser fram til å feire hundreårsjubileet i september, og håpar du blir med!